Highlands Panorama News
HOME | PROFILE | STAFF | GALLERY | COMPANY ASSOCIATIONS | CONTACT
 

Die Outoppie se kommentaar
Houtwerk

TOE ek destyds my huis gekoop het, het ek vir my ’n werkswinkel ingerig vir houtwerk en ’n herlaaikamer gebou vir my skietwerk, kompleet met die nodige gereedskap en toerusting. Hierdie was my stokperdjies. Ek het egter toe nog in Nelspruit gewerk en het voor sonop werk toe gegaan en na sononder huis toe gekom. My vriende het gewonder oor die werkswinkel, maar ek het verduidelik dat dit my aftreeplan is. Nodeloos om te sê, maar die koerant het my die afgelope 16 jaar ook so besig gehou dat ek maar min gedoen het. Hierdie Desember het ek egter weer begin met klein houtwerk projekies. Goedjies wat dalk op ’n vlooimark sal verkoop. Die masjiene is geroes, die lemme is stomp en hulle moet almal gediens word. Erger nog, ek moet myself weer leer hoe baie van die gereedskap werk. En vergeet van lang skuurbelde vir die skuurmasjien en ander masjienonderdele in Lydenburg. Niemand hou die goed aan nie. My hande kan nog werk, hoewel een vinger reeds deur die skuurmasjien gegryp is. Gelukkig is daar pleisters! Ek moet sê dit is terapeuties om met jou hande te werk. My grootste frustrasie is dat ek met afvalhoutjies werk. Soms moet ek ’n paar plankies aanmekaar plak om ’n werkbare bord te kry en dan sit jy en wag dat die gom set. En as die dingetjie klaar is, wag jy vir die vernis om droog te word. En al jy koperhakies soek, hou almal dieselfde ou koppiehakie aan en niemand het L vormige hakies nie. Ai tog. So jy werk kort rukkies en sit en kyk hoe word die vernis droog vir lang rukke. Maar die aktiwiteit is lekker en dit is hoogs bevredigend om te sien hoe jou plannetjie vorm aanneem. Hopelik sal ek genoeg voorraad kan bou dat ek eersdaags ook by die vlooimark kan gaan uitstal! Hou vir my duim vas.

Latest Edition
Hoor Hierso
Outoppie se Kommentaar
Aan die stuur
Kry ons op Facebook
 
 
Highlands Panorama News | All Rights Reserved | 2011