Highlands Panorama News
HOME | PROFILE | STAFF | GALLERY | COMPANY ASSOCIATIONS | CONTACT
 

Die Outoppie se kommentaar
Raak betrokke

EK het al voorheen oor hierdie onderwerp gesels. Ek is werklik teleurgesteld in ons gemeenskap se onbetrokkenheid by belangrike sake in die dorp. Ons ken die spreekwoord "Die beste stuurman staan aan wal" En dit is werklik so. Waar jy kom, kerm die publiek dat die munisipaliteit / sakekamer / Cpf / of daardie forum niks vir die dorp beteken nie. Reël iemand iets, dan daag daar sewe mense op. Daar is honderde klein groeperingkies wat bejaardesorg doen, of iets vir verwaarloosde diere, of vir die armes, of vir dié of daardie kerk of dié of daardie funksie. Almal werk in hulle klein silo's en dit is altyd dieselfde gesigte wat daar te siene is. Kerkbasaars en sulke geleenthede word fluks bygewoon, want daar is iets te ete of 'n winskopie te vinde. En hier is werklik iets vir elke smaak in die dorp. 'n Fotografieklub, fietsryklub, skietklub, wynproe, kookkuns, kuns, handwerk, noem maar op. Maar waar is julle wanneer die stadsraad vergader, of die sakekamer bymekaar kom, of die dieresorg mense 'n pretstap reël? Daar is nie winskopies nie en daar word nie lekker geëet nie. Daar word van jou verwag om jou kennis en kundigheid tot voordeel van die gemeenskap te deel. As jy nie 'n kundige is nie gebeur daar dalk iets tydens 'n bespreking waar jy kan raad gee. Of 'n eier kan lê. Kortom, jy kan 'n bydrae lewer wat jou nie geld gaan kos nie en ander kan help. Ek is betrokke by die bestuur, of is 'n lid van die Sakekamer, Rusoord, BNI, die Cpf en ander organisasies. Maar die ouens word moeg vir die ou gesigte soos myne. Hoekom moet ou manne saans patrollie ry, terwyl die dorp vol fikse jongmanne is wat kuier? Hoekom verenig die buurtwag groepe nie? Ek sit ook graag voor die kaggel en die TV op 'n wintersaand, maar nee, ek is twee of drie aande van die week doenig in die gemeenskap. Kom mense, raak betrokke asseblief.

Latest Edition
Hoor Hierso
Outoppie se Kommentaar
Aan die stuur
Kry ons op Facebook
 
 
Highlands Panorama News | All Rights Reserved | 2011