Highlands Panorama News
HOME | PROFILE | STAFF | GALLERY | COMPANY ASSOCIATIONS | CONTACT
 

Aan die stuur Banner

Ons toets Ford se Figo Blu

 

FORD se Figo (wat “cool” beteken), is al vir baie jare hier beskikbaar en is immer gewild. Dié reeks is egter onlangs opgeknap en bied uitstekende waarde vir jou geld. Ek het die eerste 1.4 destyds getoets en moet sê die nuwe 1.5 drie-silinder maak hope meer krag. Die motor is ook ruimer.
Die Blu is ’n nuwe toevoeging tot die reeks en volg basies die Trend spesifikasievlak. Die reeks Figo’s bestaan uit intree Ambiente en Trend in sedan spesifikasie (groter bagasiebak) en uit Ambiente, Trend, Trend Auto, Blu en die topspesifikasie Titanium in luikrug formaat. Pryse wissel tussen sowat R 195 000 tot R 228 000 vir die een met alles in wat oop- en toemaak. Die Blu is beskikbaar teen R 212 900. Die Titanium het ’n groot raakskerm vermaaklikheidsisteem, ses lugsakke, klimaatbeheer, trurat kamera en ’n rits ander kenmerke. Die ander modelle het almal lugversorging, Ford Audio met My Ford Dock vir jou foon, elektriese ruite, lugsakke, ABS, sentrale sluit, agterste misligte en voorste misligte op meeste modelle.
Oor die reeks is drie tipes wiele in 14 en 15 duim beskikbaar en die Blu kom met 15 duim swart allooiwiele. Die spaarwiel is volgrootte staal. Daar is twee bekleedsel keuses en ses bakkleure beskikbaar in die reeks. Die Blu kom in wit met blou aksente op strategiese plekke en ’n swart dak. Baie mooi. Daar is ook blou aksente binne op al die deure en ’n mooi Blu geborduurde logo op die voorste sitplekke.
Albei sonskerms het smukspieëltjies en buitespieëls is elektries op die voorste (A) deurpilaar verstelbaar.
Sitplekke is gemaklik en daar is soveel beenspasie voor dat ’n reus met lang bene en arms gemaklik kan sit. Met normale verstelling is agterste beenspasie baie goed. Die stuurwiel en sitplekgordel ankerpunte is op en af verstelbaar.
Die driesilinder 1.5 liter enjin is ’n juweel. Dit maak 88 kW en 150 Nm se wringkrag. Hierdie is nie intreemotor syfers nie en mens kan dit voel. Dié Ford trek en loop soos ’n bom. Teen harde versnelling is die tipiese driesilinder grom duidelik hoorbaar. Verbruiksyfers behoort heel goed te wees, aangesien daar genoeg wringkrag is dat jy nie hoef terug te skakel vanaf vyfde rat teen ’n bult nie.
Van enjingrom onder versnelling gepraat, teen selfs hoë snelhede is die Figo doodstil binne.
Die kajuit en bagasiebak is ruim en die motor voel werklik groter as ’n intreevlak motor. Ek het dié Ford op die Dullstroompad geneem en ’n stil deel gesoek met min verkeer en slaggate. Teen 120 km/u in vyfde toer die enjin rustig teen 3 300 opm en net ’n raps oor die 4 000 opm teen 160, sonder dat die enjin enigsinds hard werk. Dit voel nooit besig nie. Die lang ratverhoudings sal ook bydra tot goeie brandstofverbruik.
Veerstelsel en remme is skitterend en alle kontroles werk lekker lig. Die Figo is rigtingvas op spoed en die kragstuur het perfekte gewig op spoed en is baie lig in die dorp wanneer mens parkeer.
Ek moet eerlik sê dat ek gedink het die Figo is ’n intreevlak jongmens motor. Maar dit is veel meer. Dit voel “volwasse”. As studentemotor het dit al die veiligheidseienskappe wat nodig is en dit behoort ’n student nog baie jare na universiteit groot vreugde te verskaf. Daar is ’n 4-jaar 120 000 km waarborg met 3-jaar padhulpdiens en diensintervalle is 15 000 km. Die diensplan is 4-jaar of 60 000 km. Ter opsomming is daar feitlik niks om oor te kla nie en ek is werklik beïndruk. Dit is die perfekte motor vir ’n student, jongmens, of eerste of tweede motor vir die ouer garde. Andre Coetzee.

Latest Edition
Hoor Hierso
Outoppie se Kommentaar
Aan die stuur
Kry ons op Facebook
 
 
Highlands Panorama News | All Rights Reserved | 2011